д~_i. Ст~а'гw и= всехва'льнагw а=п\сла фiлi'ппа.

Тропа'рь гла'съ г~:

А=п\сле ст~ы'й фiлi'ппе, моли` мл\стиваго бг~а, да прегрjьше'нiй w=ставле'нiе пода'стъ душа'мъ на'шымъ.

И=ли` се'й, гла'съ то'йже:

Бл~гоукраша'ется вселе'нная, _е=fiо'пiа ликовству'етъ, jа='кw вjьнце'мъ красу'ема тобо'ю, просвjьти'вшися свjь'тлw торжеству'етъ па'мять твою`, бг~оглаго'ливе фiлi'ппе: вся^ бо вjь'ровати хр\сту` научи'лъ _е=си`, и= тече'нiе соверши'лъ досто'йнw _е=v\глiа. тjь'мъ дерзнове'ннw вари'тъ _е=fiо'пская рука` къ бг~у, _е=го'же моли` дарова'ти на'мъ ве'лiю мл\сть.

Конда'къ, гла'съ и~. Подо'бенъ: JА='кw нача'тки:

О_у=ч~нкъ и= дру'гъ тво'й, и= подража'тель стра'сти твоея`, вселе'ннjьй бг~а тя` проповjь'да, бг~оглаго'ливый фiлi'ппъ, тогw` мл~твами w\т врагw'въ пребеззако'нныхъ цр~ковь твою`, и= вся'къ гра'дъ тво'й, бц\дею соблюди`, многомл\стиве.