к~з. Ст~а'гw мч~нка каллiстра'та и= дружи'ны _е=гw`.

Тропа'рь, гла'съ д~:

Мч~нцы твои` гд\си, во страда'нiихъ свои'хъ вjьнцы` прiя'ша нетлjь^нныя w\т тебе` бг~а на'шегw: и=му'ще бо крjь'пость твою` мучи'телей низложи'ша, сокруши'ша и= де'мwнwвъ немощны^я де'рзwсти. тjь'хъ моли'твами сп~си` ду'шы на'шя.

Конда'къ, гла'съ д~. Подо'бенъ: JА=ви'лся _е=си`:

Вся'къ тру'дъ дне'сь цр~ковь ны'нjь соверша'ющи ст~i'и, восхваля'етъ та'инственнw, jа='кw за ню` страда'льчествовавшыя мч~нцы бж~е'ственнiи, добропобjь'днiи, всему'дрiи.

Конда'къ, гла'съ д~. Подо'бенъ: Вознесы'йся на кр\стъ.

Многоwбра^зныя ра^ны претерпjь'вше, и= вjьнцы` w\т бг~а jа='вjь прiи'мше, w= на'съ моли'теся бл~же'ннiи хр\сту`, па'мять всепра'зднственную ва'шу соверша'ющихъ, велича'йшiй каллiстра'те, со страда'вшими съ тобо'ю, _е='же о_у=мири'ти па'ству и= лю'ди: то'й бо _е='сть вjь'рныхъ о_у=твержде'нiе.

И= прп\дбнагw _о=тца` на'шегw савва'тiа солове'цкагw чудотво'рца.

Тропа'рь, гла'съ г~:

О_у=дали'вся мi'ра и= водвори'вся въ пусты'ни, до'брымъ по'двигомъ подвиза'лся _е=си`, sлострада'нiемъ и= внима'нiемъ и= мл~твами: w\т_ону'дуже и= по сме'рти и=сточа'еши и=сцjьл_е'нiя, савва'тiе _о='тче на'шъ. моли` хр\ста` бг~а, сп~сти'ся душа'мъ на'шымъ.

Конда'къ, гла'съ в~:

Жите'йскiя молвы` w\тбjь'гъ, всели'лся _е=си` въ морскi'й _о='стровъ, му'дре, и= кр\стъ тво'й взе'мъ, хр\сту` послjь'довалъ _е=си`, въ моли'твахъ и= во бдjь'нiихъ и= въ поще'нiихъ, sлострада'ньми пло'ть твою` и=знуря'я: тjь'мъ бы'лъ _е=си` преподо'бныхъ о_у=добре'нiе: сегw` ра'ди любо'вiю па'мять твою` пра'зднуемъ, преподо'бне савва'тiе, моли` хр\ста` бг~а непреста'ннw w= всjь'хъ на'съ.